නිකමට වගේ යුනිකේත 6:29 PM

පහුගිය දවසක මට අහම්බෙන් වගේ තේරුනා "නිකමට වගේ" බ්ලොග් එක සිංහල බ්ලොග් කියවනයෙන් ඉවත් වෙලා කියල. ඉතිං මේ ගැන දන්න කියන යාළුවන්ට එහෙම මම හොඳට වාතයක් වුනා. වරදක් හොයාගන්න බැරි තැන සිංහල බ්ලොගර්ස් ගෲප් එකට මේල් දාලා, ඇඩ්මින් කෙනෙකුට ෆේස්බුක් පණිවිඩ දාල අරව මෙව්ව කරල ආයෙත් සිංහල බ්ලොග් කියවනයට ඉල්ලීමක් ඉදිරිපත් කළා, "නිකමට වගේ" සිංහල බ්ලොග් කියවනයට ඇතුළත් කරන්න කියල. ඉතිං ඔන්න සති එකහමාරකට විතර පස්සෙ මට අද පිළිතුරක් ලැබුන. මෙන්න ඒ පිළිතුර හරහා ඇතිවුණ නිල සංවාදය.

ඇඩ්මින්වරයා - 

චායාරූප වල සිංලෙන් ලියූ බ්ලොග් ඇතුලත් කල නොහැක, සිංහල යුනිකේත යොදාගත් බ්ලොග් පමණයි ඇතුලත් කල හැක්කේ.

මගේ පිළිතුර - 

දින ගණනක් මග බලාගෙන හිටපු උත්තරය මේ වෙලාවෙ ලැබුන එක ගැන හරිම සතුටුයි මිත්‍රයා.

උපුටා ගැනීම - මගපෙන්වීම හා නීතිරීති
"2. ඡායාරූප පමණක් හා සිංහල අන්තර්ගතය අඩු අඩවි ඇතුලත් නොකෙරේ. (ඡායාරූප බ්ලොග් එකක් නම් සිංහල අන්තර්ගතයක් ඇතුළත් විය යුතුයි.)"

මේකෙ හැටියට නම් ඡායාරූප විතරක් තියෙන බ්ලොග් පවා ඇතුළත් කරනව සිංහල අන්තර්ගතයක් තියෙනව නම්. ඒ වගේම මගේ බ්ලොග් එකට ගියොත් පෙනේවි ඒකෙ තියෙන්නෙ "ඡායාරූප වල සිංලෙන් ලියූ"  දේවල් විතරක් නොවෙන බව. බ්ලොග් එක තුළ මම පවත්වගෙන යන කතාව "ඔබම නමක් කියන්න" ඇතුළු අනිත් හැමදෙයක්ම ලියවෙන්නෙ සිංහල යුනිකේත වලින්. ඒ වගේම මම ඇතුළත් කර ඇති සියළුම ඡායාරූප තුළ ඇත්තේ සිංහල අන්තර්ගතයක් කියලයි මම හිතන්නෙ. මොනව වුණත් පිළිතුරක් එවීම ගැන හරිම සතුටුයි. ඒ වුණත් මට තියෙන ගැටළුව මගේ බ්ලොග් එක ඉවත් කරන්න මෙච්චර කාලයක් ගියේ ඇයි කියන එක. කමක් නෑ හැමෝම කාර්ය බහුල ඇති. එ වගේම මට හරිම සතුටුයි මම ලියල තියෙන දේවල් "චායාරූප වල සිංලෙන් ලියූ" දේවල් හැටියට සැලකීම ගැන. මම හිතුවෙ එව්ව "කවි වෙන්නැති" කියල.

උපුටා ගැනීම - මගපෙන්වීම හා නීතිරීති
"6. බ්ලොග් අඩවිය ඇතුලත් කිරීමට සුදුසු දැයි තීරණය කිරීමට සිංහල බ්ලොග්කරුවන්ගේ සංසදයේ කලමණාකරුවන්ට අයිතියක් ඇත.
7. ඔබ ඇතුළත් කරන අඩවියට එරෙහිව පැමිණිල්ලක්, නීති/රීති උල්ලංඝණයක් ඇතිවුවහොත් ඒ පිළිබඳව තීරණය කළමනාකාරිත්වය සතුවන අතර, ඒ බ්ලොග් අඩවිය සින්ඩිකේටරයට නුසුදුසුයැයි තීරණය වුවහොත් ඉවත් කෙරෙනු ඇත."

මේ අනුව තීරණය ඔබ සතු වන අතර, මෙයට පිළිතුරක් ලබා දීමට කාරුණික වන මෙන් ඉල්ලමි.

ඇඩ්මින්වරයා - 
හිතවත් සදුන්,

"1. ඇතුළත් කළ හැක්කේ සිංහල යුනිකේත මගින් ලියූ සිංහල බ්ලොග් අඩවි පමණි."

එක මග හැරිලා නේද ? Photo වල සිංහලින් ලියපුවහම ඒක සිංහල යුනිකේත වනේ නෑ. අනික එකක්, දෙකක් පොස්ට් සිංහලෙන් ලියපුගමන් බ්ලොග් එක සිංහල යුනිකෝඩ් වෙනේ නෑ. photo එක දාලා ඒකට යටින් සිංහල යුනිකේත වලින් ලිවුවනම් මේ ගැටලුව නෑ.

"2. ඡායාරූප පමණක් හා සිංහල අන්තර්ගතය අඩු අඩවි ඇතුලත් නොකෙරේ. (ඡායාරූප බ්ලොග් එකක් නම් සිංහල අන්තර්ගතයක් ඇතුළත් විය යුතුයි.)"

මෙයින් අදහස් කරනේ සිංහල යුනිකේත මගින් ලියපු. කියන එක මිසක් photo එකක් ඇතුලේ හෝ වෙනස් සිංහල ලියන විදියකින් ලියපු කියන එක නොවෙයි.

මගේ පිළිතුර -

ඔව් මිත්‍රයා මම

"1. ඇතුළත් කළ හැක්කේ සිංහල යුනිකේත මගින් ලියූ සිංහල බ්ලොග් අඩවි පමණි."

කියන එක මග හැරීමට හේතුවක් තියෙනවා.
මම තේරුම් ගන්න විදියට යුනිකේත කියන්නෙ මේ වෙනකොට අන්තර්ජාලයේ සිංහල භාවිතා කරන හැමකෙනෙකුටම පොදු දෙයක්. ඒ නිසා යුනිකේත වලින් ලිව්වම හැමකෙනෙකුටම කිසිම ගැටළුවක් නැතිව කියවන්න පුළුවන්. මම හිතුවේ ඔබ සංගමය පෙනී සිටින්නේ අන්තර්ජාලය තුළ සිංහල භාවිතය වෙනුවෙන් කියල. අන්තර්ජාලය තුළ සිංහල භාවිතය පහසු කරවීමට බිහි වුණ මෙවළමක් හැටි‍යට යුනිකේත හඳුන්වන්න පුළුවන්. දැන් ඔබ මේ කියන කතාව මම තෙරුම් ගන්නේ ඔබ සංගමය අන්තර්ජාලය තුළ යුනිකේත භාවිතය වෙනුවෙන් පෙනීසිටිනවා පමණයි, යනුවෙන්. මම මගේ බ්ලොග් එක තුළ සිංහලෙන් ලිවීම සඳහා යුනිකේත හැර වෙනත් කිසිම අකුරු වර්ගයක් භාවිතා කරල නෑ.

පින්තූරයක් මත යමක් ලිවීම මම අදහස් ප්‍රකාශ කරන මාධ්‍යය. මම නිර්මාණයක් බිහිකරන මාධ්‍යය.

"photo එක දාලා ඒකට යටින් සිංහල යුනිකේත වලින් ලිවුවනම් මේ ගැටලුව නෑ."

මිත්‍රයා මේ විදියේ දෙයක් ඔබ ප්‍රකාශ කිරීම තුළම මම තේරුම් ගන්නා සත්‍යය නම් ඔබේ රසවින්දනයේ ගැටළුවක් තියෙන බව. ඒ නිසා තවදුරටත් මේ ගැන මම ඉල්ලීම් ඉදිරිපත් කරන එකේ තෙරුමක් නෑ කියල මට හිතෙනව. අලියා මෙහෙයවන්න හෙණ්ඩුව ඕනෙ. එහෙමයි කියල අපි හෙණ්ඩුව ගැන වර්ණනා කරන්නෙ නෑ මිත්‍රයා. අලියා තමයි වටින්නෙ. අන්තර්ජාලයේ යුනිකේත භාවිතය ගැන නෙමෙයි, සිංහල භාවිතය ගැන පෙනී සිටින්න. යුනිකේත ඒකට මෙවළමක් කරගන්න. 

ඇඩ්මින්වරයා - 

හරියට හරි, අපේ උත්සාහ කරනේ සිංහල යුනිකේත බාවිතය වැඩිකිරීම මගින් සිංහල වෙබ්(බ්ලොග්) අඩවි වැඩි කිරීම. Photo එකක සිංහලෙන් ලියන්න යුනිකේත ඕනේ නෑ. යුනිකේත එන්න කලින්ම උනත් ඒක කරන්න හැකියාව තිබුනා, අපේ පරමාර්ත ඒක මගින් සිදුවෙන්නේ නෑ.

සිංහල බ්ලොග් කියවනයට ඇතුලත් කරේ නෑ කියනේ ඔබේ අදහස් ප්‍රකාෂකිරීමේ අයිතිය නැති කිරීමක් නොවෙයි, එයට ඇතුලත් කරේ නෑ කියලා බ්ලොග් අඩවිය අන්තර්ජාලයේ නැතිවෙන්නේ නෑනේ.
 

මගේ පිළිතුර - 

බොහොමත්ම ස්තුතියි මිත්‍රයා.
                      -----------------------------





මේ හේතුව නිසා මම නිකමට වගේ ලියන දේවල් එම සින්ඩිකේටරයේ මීට පස්සෙ අප්ඩේට් වෙන්නෙ නෑ. ඇත්තටම එම සිංහල බ්ලොග් කියවනය හරහා සිංහල බ්ලොග් ලියන පිරිසට ලොකු සේවයක් වෙනව. ඒක මම ඉහළින්ම අගය කරනව. ඒ වගේම මෙච්චර කල් වැරදීමකින් හරි "නිකමට වගේ" බ්ලොග් එක එම බ්ලොග් කියවනයේ තිබ්බ නිසා මම ලියන දේවල් කියවන්න නිරන්තරයෙන්ම පිරිස මේ පැත්තට ආව. ඒ නිසා "නිකමට වගේ" බ්ලොග් එක එයින් ඉවත් කරන්න මේච්චර කල් ප්‍රමාද කිරීම ගැන මම නැවතත් ස්තූතිවන්ත වෙනවා. 

ජය! 

සසම්භාවී මොහොතක 6:23 PM

ඔබම නමක් කියන්න. 9 කොටස 4:09 PM

ඇත්තටම ඇයි මම එහෙම හීනයක් දැක්කෙ? ඒ හීනෙ හිටපු, මට එකම එක වතාවක් විතරක් මුණ ගැහුනු ඒ කෙල්ල දැන් සැරෙන් සැරේ මගේ ඔළුව ඇතුලෙ ඇගේ ඒ අත්තටු විහිදගෙන පියාඹිනව වගේ මට දැනෙනව. මට හිතුන දුවල ගිහින් කොහේ හරි මුල්ලකට වෙලා නිදා ගන්න. මට හිතුන එතකොට මට ආයෙත් ඒ හීනෙම පෙනේවි කියල. දෙයියනේ මට ඒ හීනෙ ඇතුලේ සදාකාලිකවම ජීවත් වෙන්න පුළුවන් නම් කොච්චර දෙයක්ද? ඒත් මම සදාකාලිකවම ජීවත් වෙන්න පතන ඒ හීන ලෝකෙ ඔෆිස් එකේ වැඩ නිසා සැරෙන් සැරේ සුනුවිසුණු වෙලා ගියා. තේරුමක් නැති මීටින්, වැදගත් වැඩ, නොවැදගත් වැඩ, ඇත්ත වගේ කරන බොරු වැඩ නිසා මට එක දිගටම මගේ හීන ලෝකෙ ඉන්න බැරි වුණා. දවල් කෑමෙන් පස්සෙ සැනසිල්ලෙ සිගරට් එකක් පත්තු කරගන්නකොටයි මට තේරුනේ අද දවසටම මම තාම සිගරට් එකක් බීල නෑ නේද කියල. වෙනද කොච්චර වැඩ තිබ්බත් මේ වෙනකොට සිගරට් දෙක තුනක් බීල ඉවරයි. අනේ මන්ද මට මොකක් වේගෙන එනවද කියල. සිගරට් දුම මගේ පෙනහළු තුළ කැරලි ගහද්දි මට නැවතත් මගේ හීනෙට යන්න පුළුවන් වුනා. ළමා සාරිය, කළු ලෙදර් සපත්තු, අත්තටු, ඇගෙ මූණ. ඇයි මට හිතෙන්නෙ මේ හීනෙම මම කලින් දැකල තියෙනව කියල. එක්කො මම බලපු ෆිල්ම් එකක තිබ්බද, නැත්නම් මොකක් හරි වීඩියෝ එකක තිබ්බද, ඇඩ් එකක, මියුසික් වීඩියෝ එකක..මොන මගුලක හරි මම මේක දැකල තියෙනව කියල මට සැරෙන් සැරේ හිතෙනව. මට හිතුන මේක කාට හරි කියන්න. කාගෙන් හරි අහන්න. මගේ හීනය තෝරලා දෙන්න කියන්න. ඒත් ඒකෙන් ඇති වැඩේ මොකද්ද? වැඩක් තිබුනත් නැතත් අඩු තරමේ මගේ හිතට සැනසිල්ලක් දැනේවි. සිගරට් බට් එක ඈශ්ට්‍රේ එක පතුලෙ තනි කරල මම කෝල් එකක් ගත්ත මගේ අතිජාත යාළුවෙකුට. ඒ වෙලාවෙ ඔහුටම කෝල් කලේ ඇයි? වෙන යාළුවෙක් මතක් නොවී ඔහුවම මතක් වුනේ ඇයි කියන එක ගැන කිසිම දෙයක් ඒ මොහොතේ හිතුනෙ නෑ. නිතරම මම ෆිල්ම්, මියුසික් බෙදා හදා ගන්නෙ ඔහුත් එක්ක. සමහර විට  ඒ නිසා මම ඔහුටම කෝල් කරන්නැති.

"හලෝ ලොකු අයියේ..."

"හෙලෝ බ්‍රදර්!"

මෙහෙම අරම්භ වෙච්ච කතා බහේ මැදක් හරියෙදි මම මගේ හීනෙ මගේ යාළුවට එළි කලා.

"මචං මම ඊයෙ මාර හීනයක් දැක්කනෙ"

"ආ දැං උඹට හීනත් පේනවද?"

"කුණුහර්ප නැතුව මේක අහපං බං"

මගේ හීනය මම දිගටම කියාගෙන ගියා. හීනය කියල ඉවරවුන ගමන් මගේ යාළුව හිනා වෙන්න පටන් ගත්ත.

"බ්‍රදර් උඹත් හරියට සෑඩ්නස් ඔෆ් සෙක්ස් එකේ බැරී යෝග්‍රො වගේනෙ"

මම අහන්න හිටපු ප්‍රශ්නෙට අහන්නත් කලින් උත්තර ලැබුන බව මට තේරුණා. නමුත් මට උත්තරේ තවදුරටත් පැහැදිලි කරගන්න ඕන වුනා. 

"මචං ඒක මොකද්ද? ෆිල්ම් එකක්ද? ඒකෙත් මේ වගේ හීනයක් තියෙනවද?"

"ඇයි බං උඹට මතක නැද්ද? මම මාස දෙක තුනකට කලින් උඹට ලින්ක්ස් වගයක් මේල් කළා. ෆිල්ම් එකක් වුනාට ඩීවීඩී එකක් නම් හොයාගන්න නෑ. ඒත් නෙට් එකේ තියෙනව ෆිල්ම් එකේ එපිසෝඩ්ස් ටිකක්. උඹේ හීනෙ ඒකෙ නෑ. ඒත් ඒකෙ තියෙනව ඔය වගේ සිටුඒශන් එකක්"

සෑඩ්නස් ඔෆ් සෙක්ස්, නම හුරු පුරුදු බවක් දැනුනත් මම දැකපු හීනය සහ ඒ නම අතර සම්බන්ධතාවක් එක පාරටම මගේ ඔළුවට ආවෙ නෑ.

"හරි මචං නෙට් එකේ බලන්නං"

එහෙම කියල කතාවට තිතක් තියල මම දුවගෙන ආවෙ කම්පියුටර් එක ළඟට. Sadness of Sex කියල ගූගල් එකේ ගහල සර්ච් කළා. රිසල්ට් ලිස්ට් එකේ මුලින්ම තිබ්බ ලින්ක් එක ෆිල්ම් එක ගැන විස්තර දුන්න. ලිස්ට් එකේ දෙවැනියට තිබ්බ වෙබ් සයිට් එක මාව මගේ හීනයට ගෙනිච්ච. දෙයියනේ මේ තියෙන්නෙ.The Sadness of Sex, Episode 1- Poison. දාල තිබ්බ පින්තූරෙ ඉන්නෙත් තටු තියෙන කෙල්ලෙක්. නොඉවසිල්ලෙන් මම ඒ වීඩියෝ එක ඕපන් කරල විනාඩියක් දෙකක් බලාගෙන හිටියත් ඒක හරියට ලෝඩ් වුනේ නෑ. දෙයියනේ මට මේක බලන්න වාසනාව නැද්ද? ඒක එහෙමම තියෙද්දි මම යූටියුබ් සයිට් එකට ගියා. ඒකෙ ගැහුව ද සෑඩ්නස් ඔෆ් සෙක්ස් කියල. රිසල්ට් එක හැටියට ආපු ලිස්ට් එකේ උඩින්ම තිබ්බ මගේ හීනය. ඒක ඉක්මණටම ලෝඩ් වුනා.

මම එක පාරක් නෙමෙයි, ඇත්තම කියනව නම් මම ඒ වීඩියෝ එක මුල ඉඳල අගට තුන් හතර පාරක්ම බැලුව. එවෙලෙ මගේ හීනය සහ මේ විඩියෝ එකේ අවස්ථා සම්බන්ධය මට ගලපගන්න පුළුවන් වුනා. ඔව් මම ඒක කලින් දැකල තිබ්බ. වීඩියෝ එක බලන මගක් හරියෙදිම මට ඒක තේරුණා. ඒ කියන්නෙ මම කලින් දැකපු ඒ රූප රාමු එක්ක මගේ හිත ඇතුලෙ පොරකන මේ කෙල්ල එකට එකතු වෙලා මගේ හීනෙට ඇතුල් වෙලා තියෙනව. මම අහල තියෙනව සමහර වෙලාවට කෙනෙක් හීනයක් විදියට දකින්නෙ තමන්ගේ උපවිඥානයේ තියෙන දෙයක් කියල. මගේ කරුමෙට හීන පිළිබඳව මම ඊට වඩා දෙයක් දැනගෙන හිටියෙ නෑ. ඒත් ඒ රූප රාමුත් මගේ හීනයත් අතර වෙනසක් තිබ්බ. ලොකු වෙනසක්. මම දැකපු ඒ කෙල්ල ඇඳගෙන හිටියෙ ළමා සාරියක්. ඇයි ළමා සාරියක්? අනේ මන්ද.. කොහොමද මම මේ අවුල විසඳගන්නෙ? මම ආයෙත් ඒ වීඩියෝ එක බැලුව. ෆිල්ම් එකේ කතාව කියාගෙන යන චරිතය මමද? කතාවට අනුව ඔහු ඒ විස්තර කරන්නෙ ඔහුගේ ප්‍රේමය ඇතිවූනු විදිය ගැන. වීඩියෝ එකේ මුල් හරියෙ තියෙනව When love enters through the eyes it is like a Thunderbolt කියල. අන්තිමට ඔහු කියනව The girl of my dreams, the Juliet to my Romeo, the Jane to my Tarzan කියල. මට එක පාරටම හිතුන, ඇත්තටම මම හීනෙන් වත් එහෙම දෙයක් හිතන්න නැතුව ඇති.

ආදරේ!

දෙයියනේ ඒ කියන්නෙ මම ඒ කෙල්ලට ආදරේ කරනවද? එකම එක පාරක් විතරක් දැකපු, මගෙන් සිගරට් එකක් ඉල්ලපු, කවුද කින්ද මන්ද කිසිම දෙයක් නොදන්න, ආයෙ කවදා මුණ ගැහේවිද කියලවත් නොදන්න ඒ කෙල්ලට මම අදාරේ කරන නිසාද මේ වගේ හීනයක් මම දැක්කෙ? දෙයියනේ මොකද්ද දැං මං කරන්නෙ?

(ඔව් මං ලියනව. කොහොම හරි හිත හදාගෙන ලියනව.)

ඔබම නමක් කියන්න. 8 කොටස 5:01 PM

අපේ ගෙවල් ළඟ බස් හෝල්ට් එකත් එක්කම පාරෙන් එහා පැත්තෙ මම නිතරම සිගරට් ගන්න යන පෙට්ටි කඩේ එලියෙ තියල තියෙන පුටුවක මම වාඩි වෙලා හිටිය. අසෝක වීදුරුවක දාල තිබුන ප්ලේන්ටි බාගෙ තාමත් මගෙ අතේ. මහ දවල් ගිනි රස්නෙ මුහුණට වැටෙන එක වළක්වන්න මම බිම ගලාගෙන හිටිය නිසා ඔළුවෙ ඉස්මුදුන ඉරේ ගිනි එළියෙන් බේරුනේ නෑ. නිකමට වගේ මම ඔළුව උස්සල බස් හෝල්ට් එක දිහා බැලුව. ළමා සාරියක් ඇඳගත්තු තරුණියක් පාරෙ එහා පැත්තෙ ඉඳන් මම ඉන්න පැත්තට මාරු වෙන්න බලාගෙන ඉන්නව මම දැක්ක. මම ආයෙත් මගේ ප්ලේන්ටිය දිහා බැලුව.

දෙයියනේ..... අර කෙල්ල! ඔව් මේ අර කෙල්ල තමයි.

මම මොහොතක්වත් අපතේ යවන්නෙ නැතුව ආයෙත් ඒ කෙල්ල දිහා බැලුව. ඔව්, ඔව්.. මේ ඒ කෙල්ලමයි. දෙයියනේ මම බලාපොරොත්තුවෙන් හිටිය ඒ කෙල්ල. ඉරේ ගිනි එළිය ඇගේ ළමා සාරියෙ වැදිල ආයෙත් මගේ ඇස් දෙකට වැදුනෙ හරියට ඊතල වගේ. ඒ ඊතල දරා ගන්න බැරි නිසා මම අහක බැලුව. ඒ ඊතල වලින් ඇස් බේරගන්න මම ඇගේ කකුල් දිහා බැලුව. ඒ මොහොතේ ලෝකයම දුවන වේගය සියයට පණහකින් අඩු වුනා වගේ මට දැනුන. අඩියෙන් අඩිය ඇය ඉදිරියට තිබ්බෙ චිත්‍රපටියක ස්ලෝ මෝශන් දර්ශණයක වගේ. දෙයියනේ මේ කෙල්ල දාගෙන ඉන්නෙ උස් අඩි තියෙන කළු ලෙදර් සපත්තු දෙකක්. ඇය තියන්නෙ දුරස් අඩි. මේ දුරස් අඩි නිසා ළමා සාරියෙ ඉස්සරහින් එක පිට එක වැටුනු පොටවල් දෙක ඈත් වුනා. එතකොට මම දැක්ක ඒ කළු ලෙදර් සපත්තු ඇගේ දණිස් දක්වාම වසාගෙන තියෙන විදිය. ලෝකය තවමත් දුවන්නෙ අඩු වේගයකින්. ඒත් මම වේගවත්. පාරේ දෙපැත්තෙන්ම ආපු හැම වාහනයක්ම ඇයට පාර පනින්න නවත්තගෙන ඉන්නව. පාරේ වෙන කිසිම මනුස්සයෙක් නෑ. ඉරේ ගිනි ඊතල දරාගෙන මම ඇගේ මුහුණ දිහා බැලුව. ඇයට අත්තටු තිබ්බ..ඇත්තමයි ඇයට අත්තටු තිබ්බ. අසෝක වීදුරුව මට අත ඇරුණ. ඇගේ අත්තටු, දැන් ලෝකය කැරකෙන වේගයටත් වඩා අඩු වේගයකින් සෙලවුණා. මාව මහ පොළවට කඩාගෙන වැටුන. මහ පොළවෙ මට දණ ගැහුන. ඇගේ දකුණු අතේ පත්තු කරපු සිගරට් එකක් තිබ්බ. ඇය ඒක ඇගේ දෙතොල් මැද තියාගෙන දුම් උගුරක් ඇද්ද. ඒ දුම් උගුර අදිනවත් එක්කම ඇගේ මුහුණ දුම අතරේ ගිලී ගියා. දුරස් අඩි තිය තිය ඇය පාරෙන් මෙහා, මම ඉන්න පැත්තට ආව. මට ඒක දරා ගන්න බැරි වුනා. ඇගේ ළමා සාරියෙන් මගේ පැත්තට හරවා එවුනු ගිනි ඊතල ආයෙත් මගේ ඇස් හිල් කළා. මම අත්දෙකින්ම මගේ මූණ වහගෙන ඔළුව පොළවේ හප්පගත්ත. මගේ ඇඟිලි, නළල හීරෙන තුරු, තුවාල වෙන තුරු මම ඔළුව පොළවෙ හප්පගත්ත.

මේක මම ඊයෙ රෑ දැකපු හීනය.

පෙට්ටි කඩේ ළඟදි මුණගැහුනු, තවමත් මට නම මතක්කරගන්න බැරි මිත්‍රයා ගැනත්, මගෙන් සිගරට් එකක් ඉල්ලපු කෙල්ල ගැනත් හිත හිත නින්දට වැටුනු මම දැකපු හීනය. අද ඔෆිස් එකට ආපු වෙලාවෙ ඉඳන් මගේ හිතේ හොල්මන් කරන්නෙ ඒ හීනය. දැන් 10.30ත් පහුවලා. උදේට එන ප්ලේන්ටිය මගේ මේසෙ උඩ සීතල වෙලා. උදේට ආපු ගමන් පුරුද්දට කම්පියුටර් එක ඔන් කළත්, තමන්ගෙ වැඩේ ආරම්භ කරන්න ඒක් තාමත් මගෙන් පාස් වර්ඩ් එක ඉල්ලනව. මට ඒක ගහන්න අමතක වෙලා. මම පාස් වර්ඩ් එක ගහල ඒකට ඔන් වෙන්න ඉඩ දීල, මගේ හීන ලෝකයෙන් මිදිල වට පිට බැලුව. ළඟම එහා මේසෙ හිටපු යාළුව මගේ දිහා බැලුව.

"මොකෝ බං තාම වෙරිද?"

"පිස්සුද බං, වෙන සීන් එකක්. ඔළුව පොඩ්ඩක් අවුල්"

මම උත්තර දුන්න. යාළුව පුටුවෙන් නැගිටින ගමන් ආයෙත් මට කතා කළා.

"දුමක් දාමුද?"

"උඹ බීපන්, මට පොඩි වැඩක් තියෙනව"

මම එහෙම කිව්වෙ ඇයි කියල මම දන්නෙ නෑ. කොහොම වුණත් ඒ උත්තරය නිසා ජීවත් වෙන ලෝකෙන් ආයෙත් මගේ හීන ලෝකෙට යන්න මට අවසර ලැබුන. මට නිකමට හිතුන මම ඒ හීනය කළින් දැකල තියෙනව කියල. මොකක් හරි ක්‍රමයකින් මම කළින් විඳපු අත්දැකීමක් නැවත හීනයක් හැටියට මම දැක්ක කියල මට හිතුන. ඒත් මොකද්ද දෙයියනේ මේ හීනෙ? මොකද්ද ඒකෙ තේරුම? ඇයි මම එහෙම හීනයක් දැක්කෙ?

(ලියන්නෙම නෑ කියල හිතාගෙන හිටියත් මට දැන් හිතෙනව මේක දිගටම ලියන්න.)

මං මුළාවී පාර නොසොයන මං. 9:04 PM

වෙලාව මිසක් ඔරලෝසුවක් පාවිච්චි නොකරන මම. 9:46 PM

ජනේලයෙන් පැනල සිය දිවි නසාගත් මම. 4:27 PM